Blou Alumni — een erfenis, een toekoms.

Welkom by Blou Alumni – die netwerk van oudleerders en vriende van HTS Witbank wat, ongeag waar die lewe hulle geneem het, steeds verbind is aan die plek waar hulle gevorm is en deel geword het van ’n groter verhaal.

’n Alumnus is iemand wat ’n bepaalde skool of instelling se pad deurloop het en steeds ’n verbintenis daarmee behou. By HTS Witbank is ons egter oortuig dat alumni meer is as net voormalige leerders; hulle is ligtorings in ons wêreld. Blou Alumni simboliseer die identiteit, trots, waardes, tradisies en herinneringe wat ons met mekaar deel. Dit is die kleur van die baadjie en rugbytrui wat ons gedra het, die gange waarin ons geloop het, die vriendskappe wat gevorm is, die uitdagings wat ons oorwin het en die drome waarmee ons die skool verlaat het.

’n Sterk alumni-netwerk behoort nie net terug te kyk nie – dit moet vorentoe bou. Blou Alumni skep die geleentheid vir oudleerders om weer met mekaar en met HTS Witbank kontak te maak, herinneringe te deel, verhoudings te herstel en nuwe netwerke te bou. Ons glo dat elke oudleerder ’n storie het om te vertel, ’n ervaring het om te deel en iets het om terug te gee.

Die skool is deel van jou storie – en jy is deel van ons storie. Ons nooi alle oudleerders en vriende van HTS Witbank om deel van Blou Alumni te word.